ear Mable and Daniel： 多謝你們的問候呀！想不到你們會以為我在殉道。後來收到不少電話問：「咁即係點啫，你醫定唔醫啫？」重看個blog，發現自己原來很多沒有交待的地方，累大家擔心，實在不好意思。 首先，我從來沒有拒醫的意思，目前，我正等候瑪麗醫院的安排，一收到電話，

我就即刻入院做手術啦！為了養得肥肥白白上手術床俾人鋸，我已好努力將很多食物倒入個胃度！因為前排以為胃有事，所以唔敢食飯，結果暴瘦15磅，依家要努力養肥自己。 正正當我要奮起為主食七咁食之際，秘書姐姐有朝見我食麥記薯餅，就恐嚇我：「你重食薯餅！」吓，有cancer唔食得薯餅㗎咩！食晏重慘，買咗雞鴨飯加色，美術部姐姐問：「裡面D乜嚟㗎？」「雞同鴨囉！」「雞有激素，鴨有毒，通通唔食得！」

我開始懷疑D同事其實唔係為我好，事實係想食我D嘢！ 為了得到專業意見，我已經約咗中醫了解戒口的清單，大家唔使再講我唔食得D乜啦！我唔信你哋㗎啦，你哋其實想食我D嘢就真！不過，講番轉頭，都係交代少少歷史好D。

我自細係藥煲一個，家父不嬲掛在口邊：「咁多仔，使得最多錢都係你！」所以，我自細已經好鐘意聞醫院的味道，一返醫院就有feel at home的感覺。大個重大劑，唔知點解，成日俾車撞，小學一次，大學一次，中神帶trip一次，全部都係撞左邊。

所以，識得我的都暗串：「同陳生坐車，千祈唔好坐佢左邊！」 不知你們有冇睇一套叫《不死劫》（Unbreakable）的電影。它是印度導演禮切沙也馬蘭（M. Night Shyamalan）在荷里活的第二部作品，講布斯韋利士（Bruce Willis）飾演的奇人不知為甚麼，所有意外都能逢凶化吉，原來冥冥中上帝揀選了這批人是有一個使命給他。

這就是你們提的召命吧！我時常在想：「上帝既然不要我給車撞死，那麼我會點死呢？」講真，當我知道我有癌症時，我終於明白這就是我的死法囉！所以，我嗰Ｄ分享係有少少背景的，但並不代表我厭世㗎！ 我總覺得上帝係好幽默的，我成日響度問：「楊醫成日講《傳道書》裡頭所說的『份』（portion）對我來說有甚麼意義？」

當我上網查，知道我的壽命最快1年，最慢就5年（當然那是甚麼也不做的情況講），我就以這個為我的「份」，更努力去生活，為主作工。奇又奇在，大家似乎對我的的《市井讀經》沒太大興趣，反而睇我的患癌宣言就興興致勃勃，很感謝你們的關心，特別感謝信望愛團契的兄姊為我的祈禱。

明年三月是我跟太太結婚二十年的紀念，在上星期四接到報告後，我就跟老婆講：「我一定可以跟你慶祝這個重要日子，我會好好活下去。」很抱歉，今年不能跟你們在「靈命培育小組」一起經歷神，重看早期的小組筆記，原來最後一堂我是會講「死亡」在我們靈命培育的位置，想不到事隔多年，今日講的相信會比當年的分享更豐富。

願主大大祝福你倆

榆