前禮拜三做化療，驗血話我癌指數升高至46。醫生叔叔話：「我好唔高興（見到呢個數字），不如你做次PET Scan。」當然係我俾錢，隔個星期二做完，星期三返去做化療兼睇報告，老婆二仔底死跟。

睇完片，又係嗰個醫生：「你個肚有粒2cm組織噃！」
我老婆問：「如果確診係腫瘤，咁你地會做乜？」

「加更毒嘅藥囉！」

「咁可唔可以試吓電療、開刀、標靶治療…」

「唔係做唔到呢啲就要做嗰D架嘛！」

我老婆面色已由白轉青，跟住再問：「咁今日老公啲血OK（夠白血球），係咪打埋支針（化療）？」誰不知醫生叔叔講：「佢（即係我）依家咁情況（即已擴散）打同唔打都無乜分別！」我老婆面色由青轉黑，醫生叔叔見勢色唔係幾好：「我地會開會傾傾，到時姑娘會再call你。」「好呀，」我拉老婆走先。

說時遲，那時快，第二日姑娘話星期五醫生想見我。今次佢地派咗個最後生嘅女醫生話要同我安排做超聲波攞組織，時間不過要兩個禮拜之後，我話不如做埋CT Scan啦，佢話：「咁就要多一個月！」「我有保險，不如寫紙我去私家醫院啦！」「好，無問題。」

咁我就喺上星期二去咗私家醫院。臨入CT房前，放射科醫生睇完PET Scan片突然喺走廊同我講：「我啱啱同你醫生傾過，我懷疑你嗰粒唔係腫瘤…」「咁即係乜？」「係脾臟！」「吓，我上次做手術切埋喇噃！」「我知！點講呢…脾臟其實有啲accessories (類似大陸有台灣同海南島)，佢可能migrate咗。」呢個假設都幾make sense，明知上次切胰臟要切埋佢，驚起上嚟，就走咗佬。我瞓喺走廊聽得有點眩。

「其實我懷疑你嗰粒唔係腫瘤有三個原因，第一，PET Scan照出嚟唔係好光，第二，腫瘤應該有水，佢無，第三，佢無脂肪係外圍形成一個圈…」

「咁，即係點？」

「你依家有三個選擇，第一，就係照做CT同抽組織，不過咁，如果我的假設正確，支針篤落去脾臟可能會流血不止…」

「吓？」

「Option 2，就係先打nuclear medicine入去，check咗佢係咪spleen先。」

「咁Option 3呢？」

「咪就係如果唔係spleen，再做CT同抽組織囉！」

「咁option 2先啦！依家做呀？」

「唔係，要book，應該聽日得…」

「吓，咁我咪要白住一日。」

「咁咪抖下囉！」唉，肉隨砧板上，無計…

第二日，PET PET醫生解釋點做呢個偉大試驗：「首先抽你小小血，然後煲熟D紅血球再撈埋啲nuclear medicine再打番入你個身度，由於脾臟係個filter，壞咗嘅紅血球就儲起，tumor就過唔到，specificity達99%！」我似明非明：「好！」兩個鐘頭過去，醫生特登走出大廳同我講：「陳生，你嗰個係脾臟唔係腫瘤。你可以出院喇！」

雖然個報告依然解釋為甚麼我的癌指數升咗，不過，睇查懋聲本書（《活着就是好》，他本人也是胰臟癌患者）也提過化療後癌指數也試過高開200、300，不過，那也是false alarm。Well，上帝暫時又唔使我死住，不如索性開工，所以…

我就開工喇！

p.s. 請大家為我開工祈禱啦，同工Eric啱啱問我：「你concentration可以維持幾耐？」我答：「我可以咪埋眼開會嘅。」