有來自英國的朋友問候，我才曉得自己很少在blog交待病情，可能是講得太多，以為已經交待了。我的手術報告上面寫的是“curative”，即以成功切除腫瘤來說，那是“治癒”性的手術。醫生說其實不用做化療也可，不過為了“心理因素”，即將來若果復發而後悔當年沒做化療的話，還是做做好D！

於是乎，由十一月開始，我展開了半年的療程，每月啪三枝針，每星期一枝，第四個星期休息，合共18包大概300cc的化療藥。我用的化療藥，按醫生所講，是副作用較少的。極其量出疹、作嘔、甩頭髮（其實我已經光頭好耐）、發燒等等，打了第一次，不是太辛苦，副作用也不明顯，不過，老婆話我D頭髮好似多咗同黑咗！

第二枝就打唔到，因為驗血報告唔合格，白血球偏低。後來勉强打到，但在剛過的星期二，第三枝化療針也打不成，白血球比第二枝打不成的時候還要低。現在我們考慮停化療改睇中醫，因為唔想未到復發已經有併發症就死咗。

其實，依家辛苦都唔係化療，係肌肉痛多D。小弟傷口有尺半長，釘口數過足足二十有七，位置處於橫隔膜附近，醫生話由於劏開之後，要將上半截皮肉反上去至做到，所以兩邊肋骨聽聞要幾個月至可以唔痛。唉，就係因為上下兩截豬腩肉釘埋，我已經無挺起胸膛做人好耐，背脊也因長期駝背而疼痛。不過，這情況已經慢慢改善，每朝六點好似鐘樓駝俠落街散步，吸下西環新鮮空氣，嚇下D街坊，條骨又直番。

至於中醫嘛， 網友Walter兄問過我。到目前為止，我其實沒有太明確立場。我愈來愈發現中醫很神秘，很多朋友都有好介紹，個個都講到好似超人咁，總而言之，睇佢地就會長命云云。我對中醫無偏見，事實上，開刀前，我都有睇，重係醫院的中醫，不過，睇完他的戒口清單，就唔係好明。例如：雞是可以食，不過就唔好食公雞，咁我到KFC，係咪要問隻雞脾係公定乸呢？不過，我幾鐘意呢個醫生，因為佢張戒口清單上面寫的抗癌飲品竟然有啤酒。正！不過，應該係國產先得！

p.s. 各位，為免公器私用，以後發放癌訊會改至小弟的鹹魚blog: http://hk.myblog.yahoo.com/salt_salt_fish，我已整好down咗半年的notebook，歡迎留言，