各位，登登登登，我終於入院喇，國慶入院，2號做手術。 呢鋪寧舍刺激，因為要打開個肚先知發生乜事。“做唔做到？”“究竟真係有無擴散？”“個瘤有幾毒？”通通明天揭盎，都好刺激，由於手術需時，所以我叫老婆瞓醒先來睇我，無謂乾白等。 很多人都問我是否OK？

其實，我真係只驚一樣嘢，點講好呢？有少少尷尬… 話說我上星期急症入院時，見到一個講座廣告，就係《癌症與性生活》。

睇完先知自己其實驚有癌症之後重可唔可以有性生活，再俗D一句，就係：「自己重得唔得？」 吓，都就死咯，重掛住D咸濕嘢?

係，可能大家對男人不太了解，若果唔係緊要，醫院都唔會攪D咁騎呢講座啦。 教會普遍對性一直都避而不談，就算講，都只講理論，其實兩夫妻在性方面就極度敏感。

我病後真係有次攬住老婆，就諗：「做唔做呢？做唔到又點算？」 當然，大家可以用基督教的“禁慾主義”到“愛能包容一切”來開解我，可，人生的荒謬永遠逼使我們面對信仰的真實，究竟我們的信究竟有幾到肉呢？我不知道係度講呢D嘢會唔會教壞大家？唉，我時常想，教會團契、小組究竟是個怎樣的場景可以安全地給我們分享呢？講真，有cancer之後，我發現不會影響自已作為爸爸的角色，也不會影響自已作為傳道人的職份，亦不會影響自已作為基督徒榮耀的位份，但我真的閃過的擔心是：「我還會不會是個男人，稱職的丈夫？」 不知你有無發現在團契或小組查經的時候，最渣的組長通常會叫你將憂慮分享，但當他們愈發現你有難言之忍，就愈好奇去叫你講。點知到你講完D咁敏感嘅分享，知道自己handle唔到，就一個屈尾十講句：「我地嘅分享應該以聖經為基礎」來解窘，呢D組長真係要捉去打靶！ 很多人問可以怎樣為我禱告？「主啊！求祢叫陳榆不因癌症逃避現實、活得真實、簡簡單單」就是了。