這裡有必要向一班後生講講我的外母大人。

誠如上文所述，外母大人在我出院回家後一直幫助我們，因為小弟實在禍不單行，連替我們工作了14年的菲傭也走了佬。外母大人今年76歲，她每天除洗衫、煮飯，還替我老婆改衫，因為我老婆話為了照顧我，褲頭也鬆了。

我剛出院的時候，外母大人在我周圍係咁轉，那邊剛掛好洗好的衫，那邊又將汚糟衫放到洗衣機去，洗完衫又開始煮飯。知我胃口有問題，她就不辭勞苦去剁肉餅，坦白講，連嘴刁如我的大女兒都話好食，那就更無話可說了。

我很多時候抵唔住頸，幾辛苦都搵D家務幫吓手，其中一項就是晾衫，因為外母手短，而很多衫又飛咗落街，由我去執就責無旁貸。但是我萬萬都想不到，收衫我都氣喘，重俾鐘點女傭鬧我，叫我坐係度，以後唔准做嘢。

講到呢度，我要交待以上種種外母大人的種種德行，背後是有個 “context”的。不知有多少人幹傳道的，你們的外母大人是喜歡這一行的(你們不一定需要在這裏回應！)。我當年追老婆的時候，我的外母大人就唔係咁鍾意我。唉！估唔到咁多女婿，竟然最煩嗰個竟然又係我！從這個“context”來重讀上面的分享，我想講我外母大人真係好偉大。

各位後生仔女，我最大感觸是聽了外母大人有日講句：「依家D後生點解D身體重差過我地嘅？」這句當然不是挖苦我，是因為她的親戚一位剛結婚的女兒不知怎的突然昏迷入了醫院，她趕去探望前說的。特首話出生率少，30年後特區政府要孭起沉重財政負擔，我想講更恐怖的事實是，就算生得出的後生，我懷疑有幾多可以長命百歲且可繼續交稅！

我認識幾個後生飲食習慣比我更差，是但麥當勞，大便出血又唔理，通通畏疾忌醫。問佢地有無驗身：「有，不過重差攞大便去驗！」原來，一個化驗樽會考起班30歲知青。點取樣本呢！唔疴得落屎塔，咁就要疴落報紙，咁就又煩又核突，驗尿都容易，驗屎就真係怕怕。結果，事事俱備，只欠一屎，驗身就停咗係度。

唉！各位，聽完我外母大人一句，唔該珍惜吓自己身體啦，唔通要去到我咁才知死咩！當然，我知，實有人講最好快D死，唔使煩人！唉，你咁好彩當然好，唔好彩如我，大家最後又要老人家擔心兼照顧，白頭人送黑頭人，於心何忍呢？實有人又會講：「我買左份保險俾亞爸亞媽！」

有‥錢‥大‥晒‥呀！你試吓講吖，我保證你外母、外父、老爺或奶奶一定毒鬼死你！