自有病之後，我從來沒有去想：「why me？」「why not me？」等問題，人人必有一死，我不明白為甚麼古往今來那麼多人去問一個係人都會答的問題，我想得最多的是如何令我的喪禮變成笑禮。

第一，一定沒有「守夜」。我總覺得「守夜」這個中國傳統對基督徒來說很不自然，但今日很多基督徒仍然沿用，很怪。一大堆喪家不認識的人每次到達，一係就默禱，一係就躹三個躬，本來跟來賓閒聊的家人，還要趕回就位給你回禮。太累了，且家人要不停應付：

「你不識我，我聽過陳生講道……」

「我想睇你地夠唔夠錢……」

我覺得教會的牧養神學應發明一些禮儀取代「守夜」給基督徒使用，比較“private”、比較像最後晚餐式用的“remember me”。

第二，沒有「守夜」，就一定要有追思禮拜。禮拜首要攪的就是60吋螢幕代替我的遺照，妙就妙在當來賓向我躹躬或默禱後，主家不用回禮，由我來回。螢幕上的遺照會突然向你笑，然後講一聲「多謝」！我覺得咁好激，非常有意思。因為躹躬的你會覺得好笑，連坐喺度試過的人都會繼續笑，大家一定心裡講：「黐線！」

第三，有螢幕的原因，是因為我會講埋《最後的講章》。我不是嫌一些教牧講道不好，只是以我多次講安息禮拜的經驗來看，由不認識死者和聽眾的人去講始終入唔到。當然，既然我事先張揚講的《我的cancer事件》都可以叫老婆又笑又喊，我相信我呢篇《我會喺上面睇住你地》(I ‘ll be watching you up there)一定會大賣，請有關人等，我的後代嚴禁採訪兼錄影，那只會一take過！全場惟一燒的應是這隻DVD，不知良駿兄有無興趣拍呢個V.10 version？

第四，就係一定攪抽獎，大家入場不用俾帛金，反而瞻仰遺容時可在我的遺體上抽張抽獎券，到走的時候，只要將抽獎券交門口司事，就有陳榆遺物一份，大者有LD機一部（無錯，係L-D-機），小者有書或DVD。

第五，解穢飯一定係打邊爐。打邊爐好呀！第一，就係all you can eat。第二，have fun，走來走去，且一定有主持人以陳榆瘀事比賽跟大家玩比併。第三，非常biblical，大家將來到天家都係刷餐大，不如先吃餐勁啦。

最後，唔使葬係墳場。燒完扔在海，我D屋企人每逢搭船就叫我啦：「爺爺」、「公公」、「老豆」，我一定應你！

嗱！事先聲明，版權所有，不得照抄，大家係咪好期待呢個又好玩又刺激嘅安息禮拜呢？咁就先email留位，Sandy姐姐覆示作實咯！